Daûr di De Felice 1978 Marùssi al sarès un cognon julian fat dal adatament, grafic e in part ancje fonetic, al talian dal cognon sloven Marušič e crauat Marušić, matronimic di Maruša, diminutîf e cjarinatîf dal non Mara, ipocoristic di Marija “Maria” (tal 1366 e je documentade une Marusa femine di Matherius quondam Pauli Senche de Goricia). Cheste spiegazion e je dal sigûr valide e o savìn, cun di plui, che a forin cetancj câs di “traduzions” dai varis Marussich, Marussig e Marussigh in “Marussi” (a Roncjis di Monfalcon, Turiac, Gurize). Par ce che al rivuarde il Friûl, però, no podìn no ricuardâ che il sufìs -ùs, dal valôr diminutîf, al fo une vore di mode: si pues pensâ ai tancj Candusso e Candussio, Cattarinussi, Liussi e Liusso, Gerussi, Piussi, Tolusso, Venerùs, Petrussi, Driussi, Dreussi, Bortolussi, e v.i. Stant che chest sufìs al podeve jessi ancje feminin (Corgnali, 1934), nol è di escludi che al podès leâsi al non Maria par dâ fûr Mar(i)ùs e, duncje, Marus(si). O pûr (altre ipotesi) a nons come Ademaro o simii (tal 1342 a Spilimberc Wargento nepote Hingelmarii) e dâ fûr, duncje, (Ade)marùs, (Hingel) marùs, e v.i. Tal 1343 domino Marussio de Spegnimbergo (Bortolami, 1997). Tal 1395 Marus di trasesin (al è probabil un om) paga per una braida in tavella di monastet soldi VIII (Venuti, 1979) e une Marus (cheste di sigûr une femine) e comparìs intun document cividin dal 1423 (Corgnali, 1965-67, p. 147). Tal Corgnali o cjatìn: 1300 Marussio q. D. Livisini de S. Daniele; 1333 Marusius de çopola (o Zopula) a Pordenon; 1600 Leonardo Marus de Fanna. Il cognon Marùs al è difondût a Fane (come Marusso al è a San Donà de Plâf), intune aree lontane di influenciis slovenis o crauatis tal periodi storic li che si son formâts i cognons. Marussi si cjate invezit te provincie di Gurize (di là che a Triest) e al larès valutât câs par câs par vie che e podarès jessi la “italianizazion” di cognons slovens come di formazions furlanis.